साहित्य अकादमीचे पुरस्कार झाले जाहीर, या कादंबऱ्या ठरल्या मानकरी

साहित्य अकादमीच्या विविध पुरस्कारांची घोषणा करण्यात आली आहे. त्यात ज्येष्ठ साहित्यिक भारत सासणे लिखित ‘समशेर आणि भूतबंगला’ या कादंबरीला बालसहित्याचा पुरस्कार देण्यात आला तर, तुळजापूर येथील लेखक देविदास सौदागर यांच्या ‘उसवण’ या कादंबरीला साहित्य अकादमीचा युवा पुरस्कार जाहीर झाला आहे. या पुरस्कारांची घोषणा शनिवारी साहित्य अकादमीचे माधव कौशिक यांनी केली. या पुरस्कारांमध्ये असामी, काश्मिरी, कोकणी, मैथिली, बंगाली, बोडो, इंग्रजी, गुजराती, हिंदी, कन्नड, मल्याळम, मणिपुरी, मराठी, नेपाळी, उडिया, पंजाबी, राजस्थानी, संताली, सिंधी, तमिळ, तेलुगू, आणि उर्दू या भाषेतील लेखकांच्या पुस्तकांचा देखील समावेश होता. बाकी राहिलेल्या संस्कृत भाषेतील पुरस्कारांची घोषणा नंतर केली जाणार असल्याचे देखील सांगण्यात आले.

‘समशेर आणि भूतबंगला’ या कादंबरीचे लेखक भारत सासणे हे मराठीतील ज्येष्ठ साहित्यिक आणि अखिल भारतीय मराठी साहित्य संमेलनाचे माजी अध्यक्ष आहेत. त्यांच्या या कादंबरीला बालसहित्याचा पुरस्कार जाहीर झाला असून, शिवणकाम करीत लेखन करणाऱ्या तुळजापूर येथील देविदास सौदागर यांच्या कादंबरीला देखील युवा पुरस्कार जाहीर करण्यात आला आहे. या पुरस्कारांसाठी परीक्षक असलेल्या ज्येष्ठ साहित्यिक डॉ. शरणकुमार लिंबाळे, श्रीकांत उम्रीकर आणि किरण गुरव यांनी पुरस्कारांच्या साहित्यकृतींची निवड केली आहे.

साहित्य अकादमीचा पुरस्कार जाहीर होताच काय म्हणाले भारत सासणे

बालसाहित्याच्या लेखनासाठी साहित्य अकादमीचा पुरस्कार मिळाल्याचा आनंद झाला आहे. प्रत्यक्षात अनेक वर्षे मी बालसाहित्य लिहित आहे. समशेर आणि भूतबंगला’ या कादंबरीतील पात्र जाणीवपूर्वक निर्माण करून कुमार आणि किशोरवयीन मुलांमध्ये रूजविण्याचा प्रयत्न केला. निर्माण केलेल्या पात्राच्या माध्यमातून किशोरवयीन मुलांना बुद्धिचातुर्य कथा सांगण्याचा प्रयत्न मी ‘समशेर आणि भुतबंगला’ कादंबरीतून केला आहे. या पुरस्काराच्या माध्यमातून कादंबरीतील हे पात्र रूजले आहे, याचाही आनंद आहे. या कादंबरीतील काही भाग ‘साधना’च्या अंकात प्रकाशित झाले आहेत. विशेष म्हणजे साधना अंकासाठीच काही भाग लिहिले आहेत. भारत सासणे, ज्येष्ठ साहित्यिक