जय शाह यांची ICC अध्यक्ष पदी नियुक्ती

भारतीय क्रिकेट नियामक मंडळ म्हणजेच बीसीसीआय (BCCI) चे सचिव जय शाह यांच्याबाबत एक नवी बातमी समोर येत आहे. जय शाह यांची आंतरराष्ट्रीय क्रिकेट परिषदेचे (ICC) नवे अध्यक्ष म्हणून नेमणूक करण्यात आली आहे. आयसीसीच्या (ICC) अध्यक्ष पदासाठी अर्ज करणारे ते एकमेव अर्जदार होते. त्यामुळे जय शाह यांची बिनविरोध निवड या पदासाठी करण्यात आली. येत्या 1 डिसेंबरपासून जय शाह आयसीसीच्या (ICC) अध्यक्षपदाचा पदभार सांभाळणार आहेत. 27 ऑगस्ट या पदासाठी अर्ज करण्याची शेवटची तारीख होती. जय शाह हे ३५ व्या वर्षी आयसीसीचे (ICC) अध्यक्षपद भूषविणारी सर्वात तरुण व्यक्ती ठरले आहेत.

आयसीसीचे (ICC) आधीचे अध्यक्ष ग्रेग बार्कले यांचा कार्यकाळ 30 नोव्हेंबर रोजी संपणार आहे. त्यांनी सलग दोनदा हे पद भूषवले आहे. पण, यावेळी तिसऱ्या टर्मच्या शर्यतीतून त्यांनी माघार घेतली आहे. अशा स्थितीत, जय शाह यांची नेमणूक करणं आयसीसीला योग्य वाटलं. जय शाह यांच्या नेतृत्वाखाली भारतीय क्रिकेटने खूप प्रगत केली आहे. पण, आता त्यांची आयसीसीच्या अध्यक्षपदी निवड झाल्यामुळे त्याचा फायदा नक्कीच भारतीय क्रिकेटला होईल असे सुनील गावसकर यांनी म्हटले आहे.

ICC च्या म्हणण्यानुसार, जय शाह हे एकमेव उमेदवार होते ज्यांनी या पदासाठी अर्ज दाखल केला होता आणि पुढील अध्यक्ष म्हणून त्यांची बिनविरोध निवड झाली आहे. शाह हे आयसीसी बोर्डातील सर्वात प्रभावशाली चेहऱ्यांपैकी एक मानले जातात. ते सध्या आयसीसीच्या शक्तिशाली वित्त आणि व्यावसायिक व्यवहार उप-समितीचे प्रमुख आहेत.

ICC अध्यक्षपदी निवड झाल्यावर काय म्हणाले जय शाह?

आयसीसीच्या (ICC) निवेदनानुसार शाह म्हणाले की, “आयसीसी अध्यक्षपदी निवड झाल्यामुळे मी भारावून गेलो आहे. जागतिक क्रिकेटला पुढे नेण्यासाठी मी आयसीसी (ICC) संघ आणि आमच्या सदस्य राष्ट्रांसोबत काम करण्यास वचनबद्ध आहे. आम्ही एका महत्त्वपूर्ण टप्प्यावर उभे आहोत जिथे अनेक स्वरूपांच्या सह-अस्तित्वाचा समतोल राखणे, नवीन तंत्रज्ञानाचा अवलंब करणे आणि नवीन जागतिक बाजारपेठांमध्ये आमच्या प्रमुख कार्यक्रमांची ओळख करून देणे अत्यंत महत्त्वाचे झाले आहे. क्रिकेटला आणखी लोकप्रिय बनवण्याचा आमचा उद्देश आहे.”

जय शाह म्हणाले, “जगभर क्रिकेटला अधिक पसंती मिळावी यासाठी अधिक विचार करण्याची गरज आहे. लॉस एंजेलिस ऑलिम्पिक २०२८ मध्ये क्रिकेटचा समावेश केल्याने क्रिकेट वाढत असल्याचे दिसून येते. मला विश्वास आहे की हा खेळ अभूतपूर्व मार्गांनी पुढे जाईल”